Jeremia Tah Hla : 3: 25-26

Matthaia : 28: 19-20

Ephesi : 4: 30

Sam : 37: 5 & 7

THLARAU THIANGHLIM TILUNGNGAI SUH U

A hmasa in Thlarau Thianghlim chu enge kan ti ani maithei. Kan Bible chuan Thlarau Thianghlim hi nang leh kei anga minung angin a sawi thin a, thil angin a sawi ngailo a ni. Tin, mihring anih rualin Pathian a ni bawk a ni. Chutia mihring anih chuan, keini ang hian thil duhzawng te duhloh zawngte a nei ve vek tih hi hre tel ila a tha awm e.

Thlarau Thianghlim chu engtin nge tihlungngaih in a awm thin tih han ngaihtuah ho leh ta ila.Thlarau Thianghlim ti lungngai tur hian mi zawng zawngin theihna an neilo a, ringtute chauh hian kan ti lungngai thei a. Half Yearly Meet a kan Speaker in a sawi ringtu muhil derte hian an tilungngai thin a ni. Ringtu muhil der chu kan ni ve em tih mahni theuh inzawt ta ila. Lal Isua, Lal leh Chhandamtua pawm tawh si, khawvel lama tlan leh te hi ringtu muhil der tih an ni. Muhil der te hi muhil tak tak aiin kaihthoh an har an tih ang chiah hian rinna ah pawh hian muhil derte hi muthlu tak tak emaw mi-hla kan tih emaw ai hian kaihthoh a koh kir leh hi an har zawk an lo ti thin a ni. Isua Krista Lal leh Chhandamtu-ah kan pawma reilote hnuah sualah kan tlu leh a, a then phei chu a bawihah kan han tang leh thin hi chu a zialo thin zawng anih hi. Karkhat chhung camp-ah kan lut a, Pathian thu in kan inchiah a. Kan chhuah hunah thlemna kan tawk dawn tih team member ten min hrilhlawk vek a chumi huna kan beihlet dan turte kan tlanchhiatsan dan turte nen lam min hrilh vek hnu paw’n thla hnih khat hnu lek hnuah sual ah bawk kan let leh anih chuan amawh hi chu kan phur ngam dawn lawm ni?

Khaw pakhat hi a awma, an khaw kawnah tak mai chuan Billy Graham Evangelistic Association hian Praise and Worship hun hi an hmang a, tlai dar 5 atanga zanlai dar 12 pelh thleng hun an hmang a ni. Hmundanga an hman ang thin bawkin Bill Gaither ho in ministry ho chu dar 5 ah chuan an lo che tan ta a, an zai a an lam a Pathian fakin hun an hmang a ni. Sheri Easter alo ding chhuak a, Isua neih ka duh zawk ro hlu ber aiin, A ta nih ka duh leisum zawng neih aiin......tih hla kha a aw nalh tak tham chhap chuan a rawn sa ve ta, mi sang chuang an tap a an inhlan a ni. Chutia a zai zawh rual chuan Bill Gaither chuan Sheri bawihte, “Lily parmawi ber aiin a mawi zawk e han ti leh teh,” a ti a, a chang thumna chu a han sa leh a. Tumah an awm hle hle tawh lo ani ber, Thlarau Thianghlim chu an tilungngai lo chiang hle a ni. Chuan a zai zawh chuan Bill Gaither chuan inhlanthar te tan tawngtaisakna hun a hmang a, Pathian tana rinawm turin a fuih a, helaia kan camp hman zawh tak ang bawkin thlemna an tawh tur thu te pawh a hrilh a, chumi zawh chuan an rinlawk loh leh nidanga Praise and Worship huna lang tam lo tak, an Pu ber Rev. Dr. William Franklin Graham, Billy Graham tia kan hriat lar chu stage hnung atang alo lang hlawl mai, mipui zawng zawng an ding ta thup a kut bengin an lo lawm a, Billy Graham chuan ,”Vanram ka thlen huna angel ho in min lo lawm tur ang hian ka tehkhin ber”, tiin a sawi hial a ni.

Tichuan, zanina kan thupui Eph 4:30 hmang hian thu a hril ta a, inhlan tharte tan malsawmna a dilsak nghal bawk a, chuan zan dar 10 vel alo nih chuan darkar chanve chawlh an hmang a, fakna inkhawma chhunzawmin zanlai thleng hun an hmang ta a ni. A tukah mai chuan Billy Graham leh a hote chu hmundanga rawngbawl turin an chhuak leh nghal mai a. Chu khua an kalsan tak atang chuan keini hian zirtur kan ngah hle a ni. Kum 5 hnuah pawh chuan an la hlim em em a mahse harsatna te thlemna te chu an tawk ve reng tho a nimahsela, an rilru ah Thlarau Thianghlim ti lungngai suh u tih Billy Graham sawi kha an tuh ngheh tlat tawh avangin sual an hneh in thlemna an tlanchhiatsan thei zel a ni. Kum nga chhunga thunun an neih pawh mi 43 chiah a ni. Hetiang hian keini pawh hian Camping hunlaia sermon te thawhtan zan apianga sermon kan ngaihthlak te hi kan nunah seng lut ila chu kan branch hian Thlarau Thianghlim lawmzawng hi kan va ti nasa dawn tak em ti ro u!

Jeremia Tah Hla ah khan engtin nge kan hmuh kha, “Lalpa chu Amah nghaktute tan a tha a, amah zawngtu tan chuan. Lalpa chhandamna nghah veng veng chu a tha a ni” tiin kan hmu a ni. Chuan, Sam 37: 5&7 ah khan ti hian kan hmu bawk a “I awmdan tur chu Lalpa chungah nghat la; Amah chu ring la aman a ti vek ang. Lalpa ah chuan chawl la, amah chu nghak fan fan rawh” tiin. Keini hian engtia rei nge kan nghah ve tawh le, kan nghah chhung hian sual ah vawi engzat nge kan tluk tawh le? Chhiar tham fe chu a ni tawh ang ti ru mahse kan Pathian thu chuan nghak fan fan turin min ti a, thil tha anih thu min hrilh bawk a ni. Kohhran bel ila, KTP ah hian inhmang ila, chutichuan kan nghak veng veng mai dawn a lo ni. Kohhran inkhawm te hi thulh mai mai lovin, KTP in hla zir emaw hnatlan emaw a tihin kal zat zat ila chuan Thlarau Thianghlim tihlungngaihna hun hi kan nei hman meuhlo tur hi a nia. Nimahsela, nuam kan tih zawng hi alo pawimawh em nge maw ni heng KTP activity te leh inkhawm ai chuan eng eng emaw tihtur hi kan lo nei ve neuh neuh mai a. Thil sual kan ti chuang lo kan tih lai hian rin aiin inkhawm leh KTP kan thlahthlam hian Pathian nena kan kar hi alo zau duh phian tih hi zaninah hian hre thar leh theuh ta ila a tha awm e.

Thlarau Thianghlim tihlungngaih chu boralna a ni tih chiang takin Samsona nunah khan kan hmuh kha. Pathian mi bik a ni a, a chak a an hnam innghahna a ni. Nimahsela, Pathian duhloh zawnga a awm hnu khan thlarau thianghlim a lawm lo a, a ti lungngai a ni. Pathian mi bik pawh ni se, Thlarau Thianghlim tilungngai tu chu zuah in a awm rei vak lo, a nunna hial in a tawrh phah ta anih kha. Keini pawh hian Thlarau Thianghlim hi kan lo tilungngai thin a ni maithei mahse hun tha kan neih lai hian a hnenah inchhirin i kir leh thuai ang u. Khawngaihna hun kan neih lai hi bawhpelh lo turin ka member puite hi ka sawm duh che u a ni.

Thlarau Thianghlim tilungngai loa, Lalpa chhandamna beiseia nghak veng veng tur chuan Matthaia ziaka kan hmuh ang khan chanchintha kan hril tur a ni. Kan kalchhuak theilo a nih pawhin Kohhranah rinawm taka awm a, KTP ah inhman tlata activity hrang hrang a kan tel hian chanchin tha kan hril a ni. Pathianin min kohna line a inang vek loa chuvang chuan inkhawm tauh tauh te, Kohhran leh KTP tana mi rinawm kan nih hian thui takin chanchintha hi kan lo hril ve reng ani tih hi hre thar theuh ila. Ina kan awm mai mai emaw, khawilai emaw a kan nuam tihzawng a kan khawsak mai mai ai chuan a Biakbuk thianghlim leh a thalai rualte zinga hun kan hman hnem hian Thlarau Thianghlim chu kan ti lawm zawk a, a duhzawng kan ngaihtuah hmasak hi a ngai a ni. Kan duhzawng leh nuam tihzawng hi no 1a dah lo in Kohhran leh KTP hi kan dah hmasak zawk chhung hi chuan Thlarau Thianghlim hi kan ti lungngai hauh lo ang. LALPAN MIN SAWM SAK THEUH RAWH SE.